【泥啦好嗎】泥地賽僅佔12% 本地精英苦無出路點算好？

剛周日嘅賽馬日（4月23日），身邊唔少馬迷朋友見到4草6泥嘅賽事都表示唔多開胃，人人都話要搵法印，因為真係好難捉摸呀。但係點解多泥地賽就怕怕？

先講一啲數字，眾所周知今季本地賽事新增至88個賽日，其中50個賽日喺沙田舉行、另外38個賽日則會師跑馬地。全季88個賽日總共有808場本地賽事，喺沙田舉行嘅499場賽事當中，草地佔397場、泥地佔102場，而跑馬地草地賽事就有309場。若以草地同泥地區分，前者佔87.4%，後者只有12.6%。

以往唔少馬迷都對泥地賽事認識唔多，所以興趣不大。隨住海外轉播日漸增加，馬會將美國同杜拜嘅泥地大賽帶比廣大馬迷，令大家對泥地賽事有更多嘅認知。自去年9月1日起，香港賽馬升格為國際賽事編錄標準及國際賽事統計冊中嘅第一部份，同世界大部份主流賽馬國家睇齊，但喺轉播泥地賽事之餘，作為馬壇第一部份既一份子，係咪更應該舉辦泥地嘅級際賽、甚至一級賽，務求令香港賽馬邁向國際，同世界接軌呢？

「北港火山」、「閃亮加州」、「美式法老」、「霸道駒」等等都係近代大家耳熟能詳嘅泥地賽駒。咁香港嘅泥地賽駒又有咩出路？要數最能代表香港嘅泥地馬非「好好計」及「準備就緒」莫屬。

由鄭俊偉訓練嘅「好好計」曾先後喺杜拜揚威國際三級賽北風錦標（1,200米膠沙地）及新達加短途錦標（1,200米泥地），2014年更喺美國贏出國際一級賽聖雅尼塔短途錦標賽（1,200米泥地）。呢匹曾分別由杜利萊及巫斯義執疆嘅愛爾蘭賽駒亦曾喺觸目嘅國際一級賽杜拜金莎軒錦標（1,200米泥地）連續兩年分別跑獲第二（當屆由約翰摩亞訓練、莫雷拉胯下嘅「綽力之城」奪冠而回）及第三名。

至於隸屬方嘉柏馬房嘅「準備就緒」，在港曾七度出戰全天候跑道1,650米賽事，悉數掄元，保持七戰全勝。喺最後一場勝仗中，「準備就緒」更以1分36秒34造出沙田全天候跑道第一班嘅紀錄時間，當時負磅係132磅，難度甚高。要數「準備就緒」最輝煌嘅海外戰績，一定係去年出征杜拜，喺國際一級賽麥通第三輪挑戰賽（2,000米泥地）取得亞軍，可惜喺其後嘅杜拜世界杯（2,000米泥地）無功而還。

威水史就講完，歸根究底點解香港出色嘅泥地馬要四出搵賽事參加？之唔係因為喺香港苦無出路爭功……總括嚟講，如果香港賽馬運動要達致世界水平，小編愚見認為除咗引入更多泥地血統優良嘅賽駒之外，每季應嘗試安排賽程，增設幾場泥地級際賽，先不談國際一級賽，最少先由國際三級賽辦起。又或者，如果吸引到世界各地的泥地佳駟來港作賽，也是香港賽馬發展嘅一種成就同里程碑吧！