【有前有後】火車潘首度起孖 在港兩戰未斷欖

（Source：KC.Chui）

3月26日，新見習騎師潘明輝（火車潘）在港首個賽日出戰，即憑由約翰摩亞訓練嘅「花月流星」喺第三班泥地1,200米賽事打開勝利之門。可惜嘅係，火車潘喺當日稍後賽事因墮馬而需要退出餘下賽事，不過總結全日仍交出五戰一冠兩季佳績，表現一鳴驚人。休息兩個幾星期後，喺復活星期一嘅賽馬日（4月17日）火車潘終於開返車出嚟見大家。

火車潘復出嘅第一場頭馬先出現第四場第四班1,200米賽事，佢策騎由霍利時訓練嘅「旅英駿爵」，自10檔起步積極搶放，跑咗約300米後成功佔取放頭位置，就此一放絕塵，最後大勝亞軍「萬事醒」二又四分三個馬位。「旅英駿爵」季中由文家良馬房轉倉到霍利時旗下，上仗喺田泰安胯下爆48冷贏馬後，今場藉潘明輝減10磅之利取得連捷。

潘明輝接住出現第五場第四班1,400米賽事，夥拍師傅賀賢嘅「開心健康」出賽，沿途守喺中後位置，自800米處加速，至轉入直路最後400米已透出取得領先，結果直領到底掄元。連贏兩場嘅潘明輝個人在港第一次起孖，更首次為師傅贏馬，呢場頭馬可謂別具意義。

香港賽馬向來季尾利放頭及前領馬，上季見習騎師蔣嘉琦亦憑減10磅之利於季尾彈起，最後更取得告東尼獎。潘明輝季尾加入可謂盡收天時地利，而今次佢以一放一追兩種跑法贏馬，已證明其騎功全面。究竟在港兩戰未斷欖、備受讚賞嘅佢可唔可以好似去季嘅嘉琦咁一炮而紅？今季餘下賽事拭目以待！