【馬王誰屬】賽季半程 你最喜愛的馬匹是…？

嚟到三月，馬季已經進行咗超過一半，唔少大賽已經名花有主，唔知各位馬迷又最喜歡邊匹馬呢？總結上半季，小編揀選咗四匹表現出眾嘅佳駟同大家討論一下。

綠茵賽場上以成績論英雄，首推當然係兩項國際一級賽盟主「喜蓮獎星」。雖然僅敗失落香港一哩錦標，但呢匹法國雄馬即刻捲土重來，一月先喺澳洲好手貝湯美胯下以雷霆萬鈞嘅姿態贏出董事盃。踏入二月，人馬攜手出戰途程嫌短嘅女皇銀禧紀念盃亦喺佳態下壓倒前馬王步步友再度掄元。呢匹馬轉五歲後可謂大熟大勇，亦期望可以成為馬王以祭馬主胡家驊在天之靈。

之後係由告東尼訓練嘅「美麗大師」，同樣係北半球馬。呢匹前經典一哩賽盟主先喺十一月贏得二級賽馬會一哩錦鏢，繼而一口氣贏埋正本賽香港一哩錦鏢，風頭一時無兩，當然美麗系主帥潘頓嘅發揮值得一讚。相信只要比賽當日係出現乾快場地，「美麗大師」同「喜蓮獎星」喺一哩舞台絕對係難分高下。

要數馬壇新星，不得不提嘅當然係約翰摩亞旗下嘅四歲精英「佳龍駒」喇。呢匹澳洲馬去季登場已經喺季尾贏得三級賽獅子山錦標，成績斐然，只係今季季初一度受傷患困擾，令人對佢嘅前境存有疑問。不過大摩喺四歲系列徹底釋除咗公眾嘅疑慮，「佳龍駒」先後喺首次關香港經典一哩賽及香港經典盃以極輕鬆姿態稱王，劍指打吡並成為歷史上首匹四歲三冠。

最後要講返貴為現任馬王「明月千里」，呢匹上季嘅打吡同女皇盃得主自遮打盃之後因為韌帶受傷而無再喺2016年出賽。直至今年一月，「明月千里」終於重踏草地參與董事盃熱身。剛周日，佢由好拍檔布文執疆出戰最耍家嘅2,000米一級賽香港金盃，直路看似一度受阻，但一望空旋即交出凌厲後勁奪標，喺香港三戰同程保持全勝，無負上季最佳中距離馬之名。

馬季半程，呢幾匹馬就率先彈出喇，唔知大家最支持邊匹馬呢？又最想邊匹馬成為馬王呢？